నిదురమ్మా ఓ నిదురమ్మా

పల్లవి:

నిదురమ్మా ఓ నిదురమ్మా,

యాడబోయినావె నిదురమ్మా...

రవమ్మా ఇటు రావమ్మా,

నా బిడ్డకేసి కాస్త సూడమ్మా...

మోము చంద్రబింబమల్లె ఉంటదే,

నేడు నిద్రలేక సన్నగిల్లెనే...

పాలు పట్టి కడుపు నింపినా,

లాలపోసి ఊయలూపినా,

సిట్టి కథలెన్నో సెప్పినా,

సుట్టు నిశ్శబ్దాన్ని ఉంచినా,

పసికందు కళ్ళేమొ నిన్ను సేరలేక,

అమ్మ నాన్నకేసె సూసె...

లాలిపాటె బిడ్డను లాలించలేక,

కోయిల్ల గొంతుల్తొ కూసె...

                                             "నిదురమ్మా..."

చరణం 1: 

సూరీడే ఎండల్ని మెల్లంగ సాలించి,

సెంద్రున్ని ఇటువైపు పంపె...

వెలుగుల్ని తగ్గించి వెన్నెల్నె కురిపించి,

రేరాజు చలువల్ని పంచె...

నిదురమ్మ నువుగూడ నా బిడ్డను సూడమ్మా,

నీకు పున్నెమొస్తదే...

నీ లోగిల్లో పసికందుని కసేపు ఉంచమ్మా,

నీకు పూజసేస్తమే...

"నిదురమ్మా..."

చరణం 2: 

పక్షూలు సిన్నంగ పనులన్ని ఆపేసి,

నా బిడ్డకేసి చూడసాగె...

పవనాలు సన్నంగ వేగాన్ని తగ్గించి, 

నా బిడ్డ మేను తాకసాగె...

నిదురమ్మా ఓసారీ పసికందును చూడమ్మా,

నీకు అయ్యయ్యొ అనిపిస్తదే... 

నీ కౌగిల్లో కూసంత విశ్రాంతిని ఇవ్వమ్మా, 

నీకు నాబిడ్డ నవ్వులిస్తదే...

నిదురమ్మా ఓ నిదురమ్మా,

యాడబోయినావె నిదురమ్మా...

రవమ్మా ఇటు రావమ్మా,

నా బిడ్డకేసి కాస్త సూడమ్మా...

మోము చంద్రబింబమల్లె ఉంటదే,

నేడు నిద్రలేక సన్నగిల్లెనే... 

పాలు పట్టి కడుపు నింపినా,

లాలపోసి ఊయలూపినా,

సిట్టి కథలెన్నో సెప్పినా,

సుట్టు నిశ్శబ్దాన్ని ఉంచినా,

పసికందు కళ్ళేమొ నిన్ను సేరలేక,

అమ్మ నాన్నకేసె సూసె...

లాలిపాటలు బిడ్డను లాలించలేక,

కోయిల్ల గొంతుల్తొ కూసె...